CARMINA LATINA

Viuamus mea Lesbia atque amemus

rumoresque senum seueriorum

omnes unius aestimemus assis.

Soles occidere et redire possunt

nobis cum semel occidit breuis lux

nox est perpetua una dormienda.

Da mihi basia mille deinde centum

dein mille altera dein secunda centum

deinde usque altera mille deinde centum.

Dein cum milia multa fecerimus

conturbabimus illa ne sciamus

aut nequis malus inuidere possit

cum tantum sciat esse basiorum.

(Catullus, V)

“Ride si sapis o puella ride”

Paelignus puto dixerat poeta

sed non dixerit omnibus puellis

uerum ut dixerit omnibus puellis

non dixit tibi: tu puella non es

et tres sunt tibi Maximina dentes

iam piceique buxeique

quare si speculo mihique credis

debes non aliter timere risum.

(Martialis)

Conticuere omnes intentique ora tenebant

inde toro pater Aeneas sic orsus ab alto:

infandum regina iubes renouare dolorem

Troianas ut opes et lamentabile regnum

eruerint Danai quaeque ipse miserrima uidi

et quorum pars magna fui. Quis talia fando

Myrmidonum Dolopumve aut duri miles Vlixi

temperet a lacrimis? Et iam nox umida caelo

praecipitat suadentque cadentia sidera somnos.

(Vergili Aeneidos, II, 1-9)

Tu ne quaesieris (scire nefas) quem mihi quem tibi

finem di  dederint Leuconoe nec Babylonios

temptaris numeros. ut melius quidquid erit pati.

seu pluris hiemes seu tribuit Iuppiter ultimam

quae nunc oppositis debilitat pumicibus mare

Tyrrhenum sapias uina liques et spatio breui

spem longam reseces. dum loquimur, fugerit inuida

aetas: carpe diem, quam minimum credula postero.

(Horatius, Carm. I, 11)

L. Cornelio L.F. Scipio

Aidiles Cosol Cesor

Honc oino ploirume consentiont Romane

duonoro optumo fuisse uiro

Luciom Scipione filios Barbati

Consol Censor Aidilis hic fuet apud uos

hec cepit Corsica Aleriaque urbe

dedet tempestatebus aide meretod

(Elogium Scipionis)

Naeui Epitaphium

immortales mortales si foret fas flere

flerent diuae Camenae Naeuiom poetam

itaque postaquam est Orco traditus thesauro

obliti sunt Romae loquier lingua latina.

u adimus immixti Danais haud numine nostro

multaque per caecam congressi proelia per noctem

conserimus, multos Danaum demittimus Orco.

diffugiunt alii ad nauis et litora cursu

fida petunt; pars ingentem formidine turpi

scandunt rursus equum.

(Vergili Aeneidos, II)