EPÍTOME DE LA HISTORIA SAGRADA DE LHOMOND (X)

Principales artículos de la ley.

   Haec porro sunt verba, quae protulit Deus: "Ego sum Dominus, qui eduxi vos e servitute Aegyptiorum. Non erunt vobis dii alieni; ego unus Deus, et non est alius praeter me. Non usurpabitis nomen Dei vestri temere et sine causa. Sabbato nullum opus facietis. Colite patrem vestrum et matrem vestram. Non occidetis, non adulterabitis, non facietis furtum; non dicetis falsum testimonium adversus proximum vestrum; non concupiscetis rem alterius".

Arca de la Alianza. Muerte de Moisés.

   Moises a Deo monitus confici iussit tabernaculum ex pellibus et cortinis pretiosissimis, insuper arcam foederis auro puro vestitam, in qua reposuit tabulas legis divinae. Cum iam in conspectu haberet terram a Deo promissam, mortuus est vir sapientia et ceteris virtutibus plane admirabilis. Luxit eum populus diebus triginta. Successit in locum Moisis Iosue, quem ipse prius designaverat.

Los Hebreos pasan el Jordán a pie enjuto.

   Ut Hebraei in terram promissam introducerentur, Iordanis erat traiciendus, nec erat iis navium copia, nec vadum praebebat amnis tunc pleno alveo fluens. Deus venit eis auxilio: Iosue iussit praeferri arcam foederis et populum sequi. Appropinquante arca, aquae, quae superne defluebant, steterunt instar muri; quae autem infra, descenderunt, et alveum siccum reliquerunt.

Josué levanta un monumento en memoria de tan milagroso suceso.

   Hebraei incedebant per arentem alveum, donec ripam oppositam attingerent. Tum reversae sunt aquae in locum pristinum; Iosue vero duodecim lapides e medio amne sublatos erexit, ut essent perenne rei monumentum. Dixit Hebraeis: " si quando vos interrogaverint filii vestri, quorsum spectet ista lapidum congeries, respondebitis: sicco pede traiecimus Iordanem istum; idcirco positi sunt lapides ad sempiternam facti memoriam, ut discant quanta sit Dei potentia".

Arruínanse de suyo los muros de Jericó.

   Erat in his locis urbs validissimis muris ac turribus munita, nomine Iericho, quae nec expugnari, nec obsideri facile poterat. Iosue divino auxilio fretus, non armis aut viribus urbem aggressus est. Arcam circumferri iussit circa muros, sacerdotesque antecedere, et tuba canere. Cum arca septies circumlata fuisset, muri et turres illico corruerunt. Tunc urbs capta et direpta est.

Josué hace parar el curso de sol.

   Reges Chanaan, coniunctis viribus, progressi sunt adversus Hebraeos. At Deus dixit Iosue: "ne timeas eos, tua erit victoria". Iosue igitur magno impetu illos adortus est, qui subita formidine correpti fugerunt. Tunc in eos cecidit grando lapidea, et multos interfecit. Cum autem dies in vesperum inclinaret, re nondum confecta, Iosue iussit solem consistere, et vero stetit sol, et diem produxit, donec deletus fuisset hostium exercitus.

Establece Josué a los Hebreos en la tierra prometida, y muere luego. Año del mundo 2570.

   Iosue, devictis omnibus Palestinae populis, Hebraeos in sede destinata collocavit, agros et oppida capta singulis tribubus divisit, et mortuus est. Deinde summa potestas delata est ad iudices, inter quos eminuere Gedeon, Samson et Samuel. Varia deinceps fuit Hebraeorum fortuna pro variis eorum moribus: ii saepe in Deum peccaverunt; tunc divino praesidio destituti ab hostibus superabantur; quoties ad Deum conversi eius auxilium imploraverunt, placatus Deus eos liberavit.

Aparición de un Ángel a Gedeón, a quien le anuncia que libertará a su pueblo.

   Hebraei a Madianitis vexati opem a Deo petierunt: Deus illorum preces audivit. Angelus adstitit Gedeoni: "Dominus tecum, inquit, vir fortissime". Respondit Gedeón: "si Deus nobiscum est, cur dura premimur servitute?" Ait Angelus: " macte animo! liberabis poplulum tuum a servitute Madianitarum". Nolebat primo Gedeon tantum onus suscipere, sed duplici miraculo confirmatus non abnuit.

Levanta Gedeón un ejército y marcha contra los Madianitas.

   Gedeon, contracto exercitu, profectus est cum duobus et triginta milibus hominum, et castra castris hostium contulit. Erat porro infinita multitudo in exercitu Madianitarum, nam cum iis rex Amalecitarum se coniunxerat. Tamen Deus dixit Gedeoni: "non opus est tibi tot milibus hominum. Dimissis ceteris, retine tantum trecentos viros, ne victoriam suae virtuti tribuant, non potentiae divinae".

Acomete de noche el campo de los enemigos, a los que derrota y vence.

   Gedeon trecentos viros in tres partes divisit, deditque illis tubas et lagoenas testaceas, in quibus erant lampades accensae. Hi media nocte ingressi castra hostium, coeperunt tubis clangere, et collidere inter se lagoenas. Madianitae, audito tubarum sonitu, et visis lampadibus, turbati sunt, et turpi fuga, quo quisque potuit, dilapsi sunt. Denique gladios in se invicem converterunt, et mutua caede se trucidarunt. Gedeon hostium reges persecutus est, et comprehensos neci dedit.