Schola Humanistica

Adulescentes ex America, ex Asia, ex Africa oriundi, in villam Falconeriam congregantur, quibus in aedibus humanitati omnium gentium consecratis, arti poeticae, ludis scaenicis, naturali atque morali philosophiae sedulo incumbunt

Sebastianus, adulescens oriundus ex Civitatibus foederatis Americae septentrionalis (vulgo USA), hoc anno peracto ad Universitatem studiorum Principetonianam commeabit, necdum tamen animum induxit, quaenam studia capessere velit. Am Dong, natione Sinensis, potius "Serenus" appellari vult, quae est eius nominis interpretatio. Ionut vero Dacus est, idest in finibus Dacoromaniae natus. Hi omnes in nitenti Villae Falconeriae vestibulo per risum iocosque sermocinantur, haud secus atque ceteri iuvenes, quicumque in qualibet schola una degunt. Hi tamen ideo a ceteris differunt, quod Latine inter se colloquuntur.

Patavi, diebus 23-25 m. Februarii 2020

In extremos Carnelevalis dies conventum indicimus, in quo tractabitur quicquid scurrile aut mimicum per huiusmodi ferias fieri solet. Id enim tempus nos admonet de Saturnalibus, per quae Romani convivia ac viscerationes factitabant, dum alea, risu, compotationibus hilaritatem producunt. Tum moris erat ut domini servis cenas apponerent, memoriam refricantes aetatis aureae, qua inter mortales nullum fuisset census dignitatisve aut fortunarum discrimen.